Stamboll, 27 qershor 2025 – Një ngjarje e rëndë kriminale ka tronditur opinionin publik në Turqi, ku një vajzë 18-vjeçare shtatzënë u vra me armë zjarri nga ish-i fejuari i saj 19-vjeçar në një rast të dyshuar si “vrasje nderi”.

Viktima, Oya Budak, ishte 5 muaj e gjysmë shtatzënë, pasi më herët ishte abuzuar seksualisht nga autori, Samet A. Pas marrjes vesh për shtatzëninë, ai kishte anuluar fejesën dhe të enjten në mbrëmje e thirri për një takim “për të folur”. Oya shkoi në takim e shoqëruar nga vëllai i saj 13-vjeçar, por situata degjeneroi në dhunë.

Sipas autoriteteve, Sameti nxori një armë dhe e qëlloi Oyan në gjoks dhe në vesh. Më pas, u largua me makinën e babait të tij, ndërsa banorët e zonës njoftuan menjëherë policinë. E reja u transportua në spital dhe iu nënshtrua një ndërhyrjeje kirurgjikale, por fatkeqësisht humbi jetën bashkë me foshnjën që mbante në bark.

Autori u arrestua disa orë më vonë në banesën e xhaxhait të tij, ku ishte fshehur. Gjatë shoqërimit në prokurori, kur u pyet nga gazetarët për motivin e vrasjes, ai u përgjigj pa pendesë: “Nuk pendohem, largohu!”.

Ngjarja ka shkaktuar reagime të forta në rrjetet sociale dhe në opinionin publik turk, duke rikthyer në vëmendje çështjen e dhunës ndaj grave dhe vrasjeve për “nder”.