Tiranë, 1 Korrik 2025 – Një aksident i trefishtë ka ndodhur mëngjesin e sotëm në zonën e Unazës së Re, në aksin Tiranë–Durrës, pranë fshatit Marikaj. Sipas burimeve zyrtare, në përplasje janë përfshirë tre automjete, ndërsa një prej tyre, një mjet tip Opel, ka shpërthyer në flakë dhe është shkrumbuar plotësisht.
Në vendngjarje kanë mbërritur menjëherë shërbimet e zjarrfikëses dhe patrullat e policisë rrugore, të cilat kanë bërë të mundur neutralizimin e zjarrit dhe normalizimin e trafikut në zonë.
Fatmirësisht, nga aksidenti nuk raportohet për persona të lënduar. Dëmet janë vetëm materiale.
Policia ka nisur hetimet për të zbardhur shkaqet e aksidentit si dhe për të përcaktuar rrethanat që çuan në përfshirjen e automjetit nga flakët.
Ngjarja ka shkaktuar përkohësisht bllokim të trafikut në drejtim të kryeqytetit, por qarkullimi është normalizuar pas ndërhyrjes së autoriteteve.
