Situata alarmante në Elbasan nuk është përmirësuar as gjatë orëve të natës. Zjarri i madh në pikën e grumbullimit të mbetjeve vijon të përhapë re të dendura tymi, erë të padurueshme dhe ndotje të rëndë ajri që ka pushtuar banesat e banorëve përreth. Prej më shumë se 7 orësh, flakët kanë vazhduar pa asnjë ndërhyrje domethënëse, ndërsa zjarrfikësit sipas dëshmitarëve nuk janë shfaqur as për të tentuar shuarjen.

Qytetarët e Elbasanit, të dëshpëruar dhe të zemëruar, kanë dërguar video dhe mesazhe tronditëse në redaksinë e JOQ Albania, ku dëshmojnë për pasojat e rënda të kësaj ndotjeje ekstreme:

“Akoma vazhdon e digjet. Kemi mbyllur dyer e dritare se era e keqe të mbyt. Pluhuri dhe tymi i zjarrit hyjnë brenda në shtëpi.”

“Më shumë se 7 orë pa asnjë ndalesë. As nuk e kanë marrë mundimin t’i afrohen zjarrfikëset.”

“Po vdesim nga era e keqe. Jemi larguar nga shtëpia, na mbyti tymi. 500 metra e kam nga shtëpia. Ju lutem merrni masa. Jemi familje me fëmijë të vegjël.”

Kujtojmë se më herët JOQ raportoi pamjet alarmanete, ku punonjës të inceneratorit të Elbasanit shiheshin duke i vënë vetë flakën mbetjeve, në atë që qytetarët e quajnë një masakër mjedisore e qëllimshme. Skandali ka ngritur edhe një herë pikëpyetje të mëdha mbi funksionimin real të inceneratorit, një projekt i akuzuar prej vitesh për korrupsion, abuzim fondesh dhe dështim total në menaxhimin e mbetjeve.

Ajo që po ndodh në Elbasan është më shumë se një katastrofë ekologjike, është një krim ndaj qytetarëve dhe natyrës.

Banorët kërkojnë ndërhyrje të menjëhershme dhe përgjegjësi penale për autorët e kësaj ndotjeje të qëllimshme. Heshtja e institucioneve është po aq kriminale sa vetë zjarri që po helmon ajrin që qytetarët thithin çdo sekondë.

JOQ Albania do të vijojë të ndjekë dhe denoncojë çdo detaj të kësaj ngjarjeje.