Mjeku i njohur Ilir Alimehmeti ka dhënë një mesazh të qartë për qytetarët në prag të pikut të sezonit turistik. Vera sjell jo vetëm ditë me diell, por edhe rreziqe serioze për shëndetin.

I ftuar në një emision televiziv, ai foli për shtimin e rasteve me infeksione bakteriale dhe virale gjatë muajve të verës.

“Temperaturat e larta dhe lëvizshmëria e shtuar e popullsisë krijojnë kushtet ideale për përhapjen e sëmundjeve infektive,” u shpreh Alimehmeti. Sipas tij, kontakti më i shpeshtë mes njerëzve, qëndrimi i zgjatur në ambiente të hapura dhe përdorimi i ushqimeve apo ujit të kontaminuar, janë faktorë kyç të rritjes së rrezikut.

Një nga burimet më të zakonshme të infeksioneve, sipas mjekut, është uji i ndotur, i cili mund të shkaktojë probleme të rënda gastrointestinale dhe infeksione të lëkurës. “Uji sipërfaqësor që përdoret për larje ose përgatitjen e ushqimeve mund të jetë i kontaminuar. Te fëmijët, shpesh shfaqen infeksione të veshit dhe të lëkurës pas ekspozimit në ambiente të tilla,” paralajmëroi ai.

Alimehmeti shtoi se infeksionet gastrointestinale, të shkaktuara nga ushqimet e prishura ose me yndyrë të lartë, manifestohen shpejt me simptoma si marrje mendsh, të përziera, diarre. Në raste të lehta, trajtimi mund të bëhet në kushte shtëpie, por kur simptomat zgjaten, është e domosdoshme ndërhyrja mjekësore.

Duke folur për fëmijët, mjeku nënvizoi se prindërit duhet të jenë veçanërisht vigjilentë kur shfaqen plagë në fytyrë apo gojë, pasi ato mund të jenë sinjale të infeksioneve serioze që kërkojnë kujdes të menjëhershëm profesional.