Bashkia Shkodër ka humbur një nga njerëzit më të përkushtuar të saj, kapitenin e anijes turistike Arben Anamali, i cili ndërroi jetë sot në një akt heroik për të shpëtuar dy turistë që ishin në rrezik të mbyteshin në liqenin e Shkodrës.
Ngjarja ndodhi gjatë një udhëtimi turistik, kur dy turistët humbën kontrollin dhe ranë në ujë. Pa hezitim, Arben Anamali ka hyrë në ujë për t’i shpëtuar, duke treguar guxim dhe ndihmë të menjëhershme. Pavarësisht përpjekjeve, ai nuk arriti të mbijetojë.
Arbeni ka qenë gjithmonë në shërbim të turistëve, duke kontribuar me pasion dhe përkushtim për t’i ofruar vizitorëve një eksperiencë të paharrueshme në liqenin e Shkodrës, dhe kjo është një humbje e madhe për të gjithë.
Bashkia Shkodër shpreh ngushëllimet më të sinqerta për familjen Anamali dhe të gjithë ata që e njohën dhe e vlerësuan Arbenin, duke e kujtuar si një njeri të jashtëzakonshëm dhe një hero të vërtetë.
