Lajmi për vdekjen e priftit italian Don Matteo tronditi të gjithë komunitetin, duke i lënë pa fjalë dhe të gjithë me një dhimbje të thellë.

Asgjë nuk linte të kuptohej se ai po kalonte një periudhë të vështirë. Ai kishte krijuar një marrëdhënie të ngushtë me të rinjtë e qytetit dhe sapo kishte organizuar aktivitetin veror “Grestin”.

Kush ishte Don Matteo, prifti i përkushtuar dhe inxhinieri aeronautik?

Është kryetari i bashkisë së Cannobios, Gian Maria Minazzi, ai që komenton i pari vdekjen e Don Matteo Balzanos, 35 vjeç, ndihmës famullitar në qytetin e Cannobios, në krahinën e Verbano-Cusio-Ossola. Prifti u gjet i pajetë në apartamentin ku jetonte, i cili ishte i lidhur me oratorinë që ai drejtonte. Lajmi u konfirmua nga dioqeza e Novarës.

Don Matteo nuk ishte paraqitur për meshën e mëngjesit, çka ngjalli shqetësim tek besimtarët. Kur ai nuk u përgjigj në telefon, u ngrit alarmi. Më pas erdhi zbulimi tronditës.

Me origjinë nga Grignasco, në zonën e Novarese, i lindur në vitin 1990, Don Matteo ishte inxhinier aeronautik përpara se të hynte në seminar në vitin 2010. Ai kishte shërbyer më parë në famullitë e Borgosesia, Trecate dhe në Qendrën Dioqezane të Thirrjeve.

“Ishte shumë i dashur për të gjithë. Edhe në oratori, të gjithë e vlerësonin shumë. Jemi të tronditur. Nuk kemi vënë re kurrë asnjë shenjë shqetësimi,” – vijon kryetari Minazzi. “Nuk e dimë ende çfarë ka ndodhur.”

Dioqeza ka reaguar me një mesazh të përmbajtur, përmes një deklarate të nënshkruar nga Don Franco Giudice, vikar i ipeshkvit për klerin: “Vetëm Zoti, Ai që ‘shqyrton dhe njeh’ secilin prej nesh, mund të kuptojë misteret më të thella të shpirtit njerëzor.”

Trupi i Don Matteos do të prehet në varrezat e Grignascos, pranë familjes së tij. Prindërit e tij, të shokuar, janë ende duke u përpjekur të kuptojnë çfarë e shtyu djalin e tyre të ndërmerrte një hap kaq ekstrem.