Kokëfortësia dhe dëshira për aventurë e turistëve të huaj i kushtoi jetën kapitenit të anijes, Arben Anamali.

51-vjeçari u hodh në ujërat e liqenit të Shkodrës për të shpëtuar turistët që po udhëtonin me të, por fatkeqësisht nuk arriti të shpëtonte jetën e tij.

Si ndodhi e gjithë ngjarja?

Arben Anamali kishte dalë me anijen “Drini” nga Shiroka në drejtim të Zogajve.

Pasditen e djeshme, teksa lundronin, turistët nga Izraeli i kërkuan që të futeshin në liqen për t’u larë, kërkesë që iu refuzua disa herë nga kapiteni.

Anamali i paralajmëroi për rrezikun, por askush nuk e dëgjoi.

Nga 15 veta që kishte në bord, 5 prej tyre u hodhën për t’u larë edhe pse Anamali i kishte shpjeguar disa herë se ajo që po kërkonin ishte një “aventurë” shumë të rrezikshme për shkak të erës që po frynte.

Por nuk e dëgjuan dhe u hodhën!

Megjithatë nuk ia dolën dot që të qëndronin gjatë dhe për punë minutash kërkuan ndihmë.

Në këtë moment, kapiten Arben Anamali ka notuar drejt turistëve, të cilat era e fortë i kishte larguar rreth 50 metra nga anija, ndërsa me vete kishte dhe dy komardare shpëtimi.

Njërin grup me 3 persona i ka afruar pranë anijes, e më pas ka shkuar për të marrë edhe 2 turiste të tjera.

Edhe pse të 4 turistët i ka shpëtuar, vetë nuk ka mundur dot më që t’i afrohet anijes, për shkak se i shteruan fuqitë.

Ndaj edhe sot, trupi i tij ende nuk është gjetur edhe pse po kërkohet me polumbarë.

Në Shkodër, Arben Anamali njihet si mjeshtër i motorëve të barkave dhe skafeve, por edhe kapiten i licencuar, u punësua nga Bashkia Shkodër me 1 maj të 2024 kur edhe u sollën anijet turistike “Buna” dhe “Drini”.

51-vjeçari baba i dy fëmijëve djalit 17 dhe vajzës 14 vjeçe, humbi jetën e tij, për të shpëtuat turistët.