Ndërtesa e fundit në Theth u hodh në erë me eksploziv, banorët humbasin shtëpitë që dikur u inkurajuan t’i ndërtonin vetë.

Me një shpërthim të komanduar dhe pa asnjë paralajmërim të ndershëm, qeveria shembi ndërtesën e fundit në zonën e Thethit, duke mbyllur kështu një aksion të ashpër dhe të njëanshëm ndaj banorëve që investuan vetë në një nga atraksionet turistike më të vizituara të veriut.

Forcat xheniere kishin vendosur prej orësh kallëpe eksplozivi në strukturën e ndërtesës, e cila për shumë familje përfaqësonte një shtëpi të ndërtuar me kursimet e një jete. Shpërthimi u krye në mënyrë të kontrolluar, por ajo që nuk u kontrollua ishte padrejtësia ndaj atyre që më parë ishin përkëdhelur nga pushteti për vota.

Në prag të zgjedhjeve, këto banesa u lejuan, madje u promovuan si shenja zhvillimi nga vetë kryeministri. Por pas fitores, qeveria ndërron qëndrim dhe i shpalli “të paligjshme”, duke fshirë me një shpërthim gjithçka që vetë kishte mbështetur dikur.

Ky qëndrim bipolar tregon qartë mungesën e çdo vizioni për zhvillim të qëndrueshëm. Në vend që të ndihmojë komunitetin dhe të formalizojë investimet private, shteti ka zgjedhur dhunën institucionale dhe mjetet ekstreme për të larguar njerëzit që e kanë gjallëruar turizmin malor.

Qeveria nuk ofroi asnjë alternativë reale për banorët. Nuk pati as dëmshpërblim, as plan strehimi, por vetëm ultimatume dhe eksploziv. Një shembull i pastër se si trajtohen qytetarët në një sistem që kujton autoritarizmin e viteve të errëta.

Shumë prej këtyre ndërtesave u ndërtuan jo për luks, por për vazhdimësi ekonomike. Ato ishin bujtina, shtëpi pritjeje apo struktura që ndihmonin në promovimin e turizmit lokal. Sot ato janë rrënoja, ndërsa premtimet e qeverisë janë vetëm hije të një mashtrimi elektoral.

Ndërkohë, pushteti lokal dhe qendror vijon të heshtë përballë akuzave të banorëve. Në vend të transparencës, kemi heshtje. Në vend të dialogut, kemi krisma dinamiti. Dhe në vend të shpresës, kemi zhgënjimin e një komuniteti të tërë që u përdor si mjet elektoral dhe u hodh poshtë pa mëshirë.