Pas denoncimit në redaksinë e JOQ nga një vajze e re ditën e djeshme e cila dërgoi një video të pakëndshme nga plazhi ku një i moshuar e ngacmonte me gjeste, ka ardhur një reagim i ndjerë nga mbesa e tij.

Mbesa e gjyshit e cila jeton jashtë Shqipërisë, ka kontaktuar redaksinë e JOQ duke kërkuar publikisht ndjesë.

Ajo thekson se familja do të marrë masa ndaj të moshuarit, duke theksuar se “nuk ka asnjë të drejtë të ngacmojë askënd”.

VAJZA SHKRUAN

“Përshëndetje JOQ,

Jam ndjekëse e juaja dhe po ju shkruaj si vajzë, mbesë dhe si pjesë e një familjeje. Jam mbesa e atij gjyshi që keni publikuar para gjysmë ore, i cili shihet duke ngacmuar një vajzë në plazh.

Më vjen shumë keq për atë vajzë dhe, nëse keni mundësi, ju lutem kërkoni falje në emrin tim dhe të familjes sime. Ndjej shumë turp për atë që pashë. Jetoj jashtë dhe të shoh një video të tillë më bën të ndihem jashtëzakonisht keq.

Ky problem me siguri nuk do të mbetet me kaq në familjen time, pasi do të merren masa ndaj gjyshit, sepse nuk ka absolutisht asnjë të drejtë të ngacmojë askënd.

Faleminderit shumë!”

Një vajzë ka denoncuar pranë redaksisë së JOQ një ngjarje tejet shqetësuese, e cila ka ndodhur gjatë pushimeve të saj në plazhin e Velipojës. Sipas dëshmisë së saj, ajo është përballur me një ngacmim të pahijshëm dhe të turpshëm nga një burrë i panjohur, i cili qëndronte në afërsi të zonës ku ajo po pushonte.

Ngjarja ka ndodhur në mes të ditës, në një prej zonave të frekuentuara të plazhit, duke ngritur shqetësimin për sigurinë e vajzave dhe grave në hapësira publike.

“Shikoni një maniak në plazhin e Velipojës. Vëzhgonte rreth e rrotull nëse dikush po e shikonte, dhe kur sigurohej që nuk po e shihte askush, më bënte gjeste të tilla të neveritshme. Në një çast, më bëri edhe disa gjeste të ndyra me gishta,” – shkruan vajza në mesazhin e saj drejtuar redaksisë.

Sipas saj, burri sillej në mënyrë të dyshimtë dhe të sëmurë, duke u përpjekur të mos binte në sy, ndërsa në fakt kishte në shënjestër vajzën që po pushonte qetësisht.

“Në atë moment i thashë: ‘I pafytyrë, a të vjen turp, sepse jam në një moshë me mbesat e tua!’ Por ai uli kokën, mori telefonin në dorë dhe bënte sikur nuk më kishte dëgjuar, sikur nuk isha aty fare,” – rrëfen ajo më tej.

Denoncimi është shoqëruar me një thirrje për ndërgjegjësim publik dhe reagim nga autoritetet, për të garantuar sigurinë në ambiente publike, sidomos gjatë sezonit turistik kur plazhet janë të tejmbushura me familje, gra dhe vajza të reja.

Ndërkohë, nuk dihet nëse vajza ka bërë një kallëzim pranë policisë së Shkodrës për identifikimin dhe ndëshkimin e autorit. Ngjarja ka shkaktuar reagime të shumta në rrjet, ku qytetarë të ndryshëm kanë kërkuar masa të rrepta për personat që kryejnë akte të tilla të turpshme dhe të rrezikshme.

Ky incident nxjerr në pah edhe një herë problemin e mungesës së patrullimeve të rregullta policore në zonat turistike, si dhe domosdoshmërinë e instalimit të kamerave të sigurisë dhe forcimit të masave për parandalimin e rasteve të ngacmimeve s(ksuale në vende publike.

Në një shoqëri ku viktimat shpesh heshtin nga frika e turpit ose mosbesimit ndaj institucioneve, zëri i një vajze që guxon të flasë, bëhet një thirrje për të gjithë të tjerët: Ngacmimi nuk është “çështje e vogël” – është një akt që duhet ndëshkuar me forcën e ligjit.