Isa Rexhepaj ka ndërruar jetë 5 ditë më parë në një kolibe, teksa kishte dalë për të peshkuar. Ai është gjetur mëngjesin e kësaj të premteje nga vëllai i tij.

Sipas dëshmisë që ai jep, thotë se ka lajmëruar policinë, e cila pasi ka shkuar në vendngjarje, ka kryer veprimet hetimore.

Edhe pse trupi është çuar në morgun e Sarandës paraditen e kësaj te premteje, nuk është lëvizur më prej aty, pasi është kërkuar nga autoritet hetimore që trupi të shkojë në Tiranë, për një autopsi më të thelluar, për të zbuluar shkaqet e vdekjes së 65-vjeçarit.

Por prej disa orësh trupi nuk niset për në Tiranë, pasi për shkak të ditëve të gjata i vdekur, trupi është dekompozuar, dhe 3 institucione në Sarandë, nuk po gjejnë gjuhën e përbashkët, se kush është përgjegjësi për transportin e kufomës për në morgun e Tiranës.

Spitali i Sarandës u thotë familjarëve së përgjegjës është Policia e Shtetit. Kjo e fundit bën përgjegjëse Prokurorinë e Sarandës, ndërsa Prokuoria thotë se përgjegjëse për ta çuar trupin në Tiranë, është Policia.

“Vajta e mora, kishte katër ditë i vdekur. Lajmërova policinë, erdhi ambulanca dhe e çuan në morg vëllanë. Prokuroria thotë do ta çojmë në Tiranë, por ai nuk mund të çohet se i ka rënë mishi, është nxirë, vjen era kërmë. Jam këtu para morgut, nuk më japin trupin e vëllait. Prokuroria thotë e ka Policia, Policia thotë e ka spitali, spitali thotë e ka Policia. Nuk di çfarë të bëj, unë dua të varros vëllain, t’i bëj adetet e fundit” – shprehet i vëllai.

Ky ping-pong ka bërë që familjarët të revoltohen dhe të kërkojnë sa më parë trupin e të afërmit të tyre për t’i kryer ndërrimet e fundit.