Binjaket e njohura të ngjitura, Carmen dhe Lupita, të cilat ndajnë disa organe të trupit, kanë bërë publike se njëra prej tyre është martuar, ndërsa tjetra ka zgjedhur të qëndrojë beqare. Lajmi u përhap me shpejtësi në rrjetet sociale, pasi ato treguan detajet e dasmës dhe të marrëdhënies.
Carmen, 25 vjeçe, dhe Daniel, 28, u martuan në tetor të vitit të kaluar, në një ceremoni të vogël familjare. Dasma u mbajt në urën “Lover’s Leap” në New Milford, Connecticut, dhe përkoi me përvjetorin e pestë të lidhjes së tyre. Historia u bë e njohur nëpërmjet kanalit të përbashkët në YouTube të binjakeve dhe një interviste të fundit.
Në një video me titull “Përditësim me Vonesë!”, Carmen tregoi me krenari unazën e martesës, duke u thënë ndjekësve: “U martova!” Ndërsa Lupita qeshi dhe tha me shaka: “Unë jo.”
Carmen e njohu Danielin në vitin 2020, përmes aplikacionit për takime Hinge. Ajo tregoi se shpesh i shkruanin burra me qëllime të çuditshme ose jo serioze, por Daniel ishte ndryshe – e trajtoi si çdo vajzë tjetër. “Ai nuk e bëri situatën të sikletshme. Unë zakonisht kam ankth kur takoj njerëz të rinj, por me të u ndjeva e qetë,” shtoi ajo.
Në ditën e dasmës, Carmen veshi një fustan të gjelbër me shkëlqim, dhe jo fustanin klasik të bardhë. Ajo tha se ndihej shumë mirë me zgjedhjen që kishte bërë dhe nuk kishte asnjë pendesë. Danieli ishte i kombinuar me një papion të gjelbër dhe një luledielli në xhaketë – një prekje personale për momentin e tyre të veçantë.
Edhe pse nuk u martua, mbështetja e Lupitës ka qenë shumë e rëndësishme. Ajo është shprehur hapur se identifikohet si aseksuale dhe aromantike – domethënë që nuk ndjen tërheqje romantike apo fizike ndaj askujt dhe nuk ka dëshirë të ketë një lidhje dashurie. Por e dinte që për Carmen dashuria dhe martesa kishin shumë rëndësi. “Doja që motra ime të gjente qetësinë që kërkonte,” tha ajo.
Carmen dhe Lupita janë të ngjitura në pjesën e bustit dhe ndajnë disa organe, përfshirë legenin dhe sistemin riprodhues, por secila ka zemrën dhe mushkëritë e saj – dhe emocione krejt të pavarura nga njëra-tjetra.
Ato kanë ndërtuar një komunitet të fortë në YouTube, duke ndarë jetën e tyre me sinqeritet, humor dhe guxim. Edhe pse ballafaqohen me sfida të veçanta, gjithçka e përballojnë me mirëkuptim dhe bashkëpunim.
Pasi u përhap historia, shumë ndjekës në internet filluan të bëjnë të njëjtat pyetje. Një komentues tha:
“Jam shumë kurioz si funksionon kjo, por jam vërtet i lumtur që ajo gjeti dashurinë. Është një rast kaq unik që të lind natyrshëm kureshtja.”
Një tjetër shkroi:
“Si mund të martohet vetëm njëra? Nuk është pak e padrejtë kjo në shumë aspekte?”
