Kryeministri Edi Rama ka shpallur rikthimin e tavolinave të lokaleve në trotuare, por me një plan të ri, që synon të balancojë hapësirat publike mes këmbësorëve dhe bizneseve.

Sipas kryeministrit, formula e re do të lejojë që maksimumi 25% e trotuarit të përdoret nga njësitë e shërbimit, ndërsa 75% do të mbetet për lëvizjen e qytetarëve.

Vendosja e tavolinave do të bëhet vetëm në raste të hapësirave të bollshme dhe të mbështetura nga projekte të mirëfillta urbanistike.

“Nuk do të lejohet më asnjë strukturë e ndërtuar mbi trotuare,” – tha Rama, duke theksuar se ndërtimet e paligjshme po prishen dhe se aksioni do të vijojë pa ndërprerje, jo vetëm në Tiranë por edhe në qytete të tjera dhe zonat bregdetare.

Ai bëri të ditur gjithashtu se vetëm në kryeqytet janë çliruar rreth 20 mijë metra katrorë hapësira publike, si pjesë e planit të “Rilindjes Urbane 2.0”, ku janë angazhuar arkitektë vendas dhe të huaj.

Plani i ri për vendosjen e tavolinave pritet të publikohet së shpejti për të gjitha njësitë e shërbimit në vend. Qeveria thotë se synimi është rikthimi i qytetit tek qytetarët, duke ruajtur një standard të unifikuar urban për të gjithë hapësirat publike.