Krimi i rëndë që tronditi fshatin Frashër të Fierit po merr dimensione të reja. Pas arrestimit të 26-vjeçares Emanilda Rama, e cila pranoi se vrau babanë e saj Anesti Rama, familjarë dhe të afërm kanë folur për konfliktet e hershme brenda kësaj familjeje.
Vëllai i viktimës, Ferdinant Rama, deklaroi për mediat se kishte dy vjet e gjysmë pa folur me të vëllanë, pasi, sipas tij, bashkëshortja e viktimës, Valbona Rama, nuk e lejonte të kishte kontakt. “Vëllai im kishte dy vajza. Vdekjen e tij e mora vesh nga kunata, e cila telefonoi gruan time dhe i tha se Anesti kishte vdekur”, tha ai.
Edhe kushëriri i viktimës, Edmont Rama, pohoi se çifti kishte konflikte të vazhdueshme, aq sa policia ishte thirrur disa herë për ndërhyrje. Ndërkohë, trupi i 56-vjeçarit ndodhet në morg, ku po i nënshtrohet ekspertizës mjeko-ligjore, ndërsa hetimet për zbardhjen e plotë të motivit të krimit vijojnë.
