Tropojë, 26 korrik 2025 – Një rast i rëndë i dhunës në familje është zbardhur nga shërbimet e Policisë në Tropojë, pas hetimeve të thelluara të nisura me denoncimin e familjarëve të një 48-vjeçareje të zhdukur.

Shtetasi I. Sh., 58 vjeç, banues në fshatin Bujan, është vënë në pranga, pasi dyshohet se ka ushtruar dhunë sistematike ndaj bashkëshortes së tij, N. Sh., e cila është larguar nga banesa më datë 22 korrik 2025 dhe deri më tani nuk është kontaktuar nga familjarët apo autoritetet.

Gjatë kontrollit në banesën e të arrestuarit, Policia gjeti dhe sekuestroi dy armë zjarri automatike. Armët janë dërguar në Institutin e Policisë Shkencore për ekzaminim balistik, për të përcaktuar nëse janë përdorur në ndonjë ngjarje kriminale.

Sipas burimeve zyrtare, hetimet e deritanishme tregojnë se 48-vjeçarja mund të jetë larguar për shkak të dhunës së vazhdueshme që ka përjetuar. Prokuroria pranë Gjykatës së Shkallës së Parë të Juridiksionit të Përgjithshëm Kukës ka marrë në dorë çështjen dhe po drejton hetimet për zbardhjen e plotë të rrethanave.

Shërbimet e Policisë dhe njësitë e specializuara vijojnë intensivisht kërkimet për gjetjen e shtetases N. Sh., me dyshimet se mund të jemi përballë një ngjarjeje me pasoja të rënda kriminale.

Materialet procedurale i janë referuar Prokurorisë për veprime të mëtejshme ligjore.