Dalin pamje të reja nga ngjarja e pazakontë që ndodhi pasditen e sotme në ambientet e Spitalit Rajonal të Fierit, duke u shndërruar në një sherr masiv. Nga pamjet duket se përfshihen burra, gra dhe të rinj, të gjithë të zënë keq në një situatë që degradoi në dhunë të hapur.

Sipas dëshmitarëve fillimisht përplasja nisi mes të rinjve, më pas u përhap mes grave dhe më në fund sherri degradoi mes burrave. Jashtë ambienteve të spitalit, gjithçka doli jashtë kontrollit, ku pati tension, britma dhe ndërhyrje të disa policëve që nuk po arrinin t’i mbanin në kontroll. Pamjet tregojnë qartë disa persona që godasin njëri-tjetrin me grushta, shkelma dhe ç’të kapin në dorë.

Të pranishmit shprehen se personat janë nga Levani ku mendohet se ka nisur sherri. Më pas dyshohet se kanë ndjekur nga pas njeri-tjetrin deri spital. Sipas dëshmitarëve ata bllokuan hyrjen kryesore te spitalin duke penguar hyrjen e pacientëve të sëmurë.

Ngjarja ngre shqetësime serioze për mungesën e kontrollit në institucione publike dhe nevojën për ndërhyrje të shpejtë në raste konfliktesh të tilla.