Situata në aksin nacional Burrel – Milot është përkeqësuar ndjeshëm në zonën e njohur si Qafa e Ulzës, ku qindra automjete janë bllokuar për orë të tëra. Pjesa më e madhe e atyre që kanë ngecur janë udhëtarë, disa prej të cilëve kanë nevojë urgjente për ndihmë mjekësore dhe po udhëtonin drejt spitalit të Tiranës me mjete private.
Qytetarët e bllokuar ankohen se nuk ka pasur asnjë intervenim nga autoritetet për pastrimin e borës, ndërkohë që shumë prej tyre janë përballur me mungesë karburanti, duke e bërë situatën edhe më të vështirë. Ata kërkojnë ndihmë të menjëhershme, pasi janë në kushte të vështira për disa orë.
Edhe në aksin nacional Bulqizë – Peshkopi, situata është kritike, veçanërisht në zonën e njohur si “Pishat”, ku bora ka arritur deri në 60 cm dhe era ka bërë që rruga të mbetet e bllokuar. Pavarësisht kushteve të rënda, nuk ka pasur ende një zgjidhje për hapjen e këtyre akseve.
