Një aksident me autobus në Indinë lindore la të paktën 18 persona të vdekur, tha të martën një ligjvënës vendas. Aksidenti ndodhi në qytetin Deoghar në shtetin indian të Jharkhand.

Autobusi që transportonte pelegrinët u përplas me një kamion të ngarkuar me bombola gazi, duke vrarë besimtarët që ndodheshin në bord.

“18 besimtarë humbën jetën për shkak të një aksidenti me autobus dhe kamion”, shkroi ligjvënësi lokal i Jharkhandit, Nishikant Dubey, në platformën e mediave sociale X.

Deoghar konsiderohet një qytet i shenjtë për hindutë në Jharkhand dhe është vendi ku ndodhet një tempull i madh. Qyteti pret një fluks vizitorësh gjatë muajit të shenjtë të Shravan. Kryeministri Modi komentoi gjithashtu për aksidentin, duke e quajtur atë “jashtëzakonisht tragjik”. Ai shprehu “ngushëllimet e tij më të thella” për familjet e viktimave.

Kryeministri i Jharkhand, Hemant Soren, tha se autoritetet po “ofrojnë operacione ndihme dhe shpëtimi, së bashku me shërbime mjekësore për të plagosurit”. Nuk është e qartë se sa njerëz mbijetuan nga përplasja, por mediat indiane raportuan se autobusi ka 32 vende.

Rrugët e Indisë konsiderohen si ndër më vdekjeprurëset në botë , me shpejtësinë tej normave të lejuara dhe drejtimin në anën e gabuar të rrugës që shihen si arsyet kryesore të aksidenteve./DW