Plagosje me armë automatike në Borsh – Autori i dyshuar kapet nga Policia. Emrat

Një ngjarje e rëndë ka ndodhur në orët e para të mëngjesit të sotëm në Borsh, Himarë, ku pas një konflikti në një lokal është përdorur armë zjarri automatike.

Krimi ndodhi rreth orës 02:20 të datës 31 korrik 2025, duke tronditur banorët dhe pushuesit e zonës turistike.

Sipas burimeve policore, nga konflikti ka mbetur i plagosur Erald Shullazi, 33 vjeç, banues në Krujë.

Noa.al raporton se i riu ndodhet jashtë rrezikut për jetën.

Dyshohet se pas një përplasjeje verbale dhe fizike midis disa personave, njëri prej tyre, Hekuran Çelaj, 42 vjeç, ka qëlluar me armë automatike në drejtim të 33-vjeçarit Shullazi.

Policia e Himarës ka ndërhyrë duke shkuar në vendngjarje dhe duke identifikuar dhe shoqëruar autorin e dyshuar në ambientet e DVP Vlorë për veprime të mëtejshme.

Po ashtu, disa persona të tjerë të përfshirë në konflikt janë marrë në pyetje për të sqaruar dinamikën e ngjarjes.

Grupi hetimor, në bashkëpunim me Prokurorinë, po vijon punën për të gjetur armën e përdorur dhe për të dokumentuar të gjitha rrethanat që çuan në këtë incident të rëndë. /noa.al