Pas zëvendësimit të langove të Veliajt në Bashki me nënkryetarët e rinj, dallohen se disa prej emrave janë ose zara të Belindës, ose të Bashës, por në rastin e Blendi Sulajt, ky i fundit i ka të dyja…

Në një akt sublim që dëshmon qartësisht dashurinë ndaj oligarkisë, Blendi Sulaj është emëruar nënkryetar i bashkisë Tiranë.

Por kush është nënkryetari i ri i bashkisë Tiranë?!

Rezulton se Sulaj në vitin 2021, është proceduar penalisht për ndërtim pa leje.

Arsimi i tij modest konsiston me vetëm 8 klasë shkollë, megjithëse burime pranë Bashkisë për JOQ lënë të kuptohet se mund të ketë kapërcyer direkt në arsimin e lartë, duke e anashkaluar të mesmen me një finesë që vetëm ndërtuesit pa leje dinë ta ushtrojnë.

Por ajo që e bën Sulajn me të vërtetë të veçantë, është jo vetëm aftësia e tij për të ndërtuar pa leje, por me dokumente, ura marrëdhëniesh të fuqishme. Ai rezulton që deri në 2020-ën të ketë qenë ortak biznesi me Andri Kasnecin, nipi i oligarkut të famshëm Bashkim Ulaj.

Sulaj ka qenë i njohur më parë për angazhimin e tij politik në radhët e Partisë Republikane të Fatmir Mediut, e më pas si kryetar i Forumit Rinor të Partisë Demokratike gjatë kohës së Lulzim Bashës.

Këto zgjedhje ai kandidoi në listat e hapura të PS. Vetëm pak muaj më parë, kompania “ASINVESTMENT” në pronësi të Blendi Sulajt është shpallur fituese e një tenderi publik me vlerë rreth 100 milionë lekë, në 31 janar 2024.

Tenderi, i cili është dhënë pa garë, është kategorizuar me “flamur të kuq” për mungesën e transparencës dhe konkurrencës, çka e bën edhe më të dyshimtë lidhjen mes përfitimit ekonomik dhe afrimit me pushtetin.