Një krim i rëndë dhe i pazakontë ka tronditur qytetin Gemona del Friuli në veri të Italisë, ku trupi i copëtuar i Alessandro Venier, 35 vjeç, u gjet në bodrumin e shtëpisë së tij, i fshehur brenda një bidoni plastik dhe i mbuluar me shtresa gëlqereje, për të fshehur erën e rëndë të dekompozimit.

Për ngjarjen janë arrestuar në vendngjarje nëna e viktimës, 62-vjeçarja Lorena Venier, dhe partnerja e tij kolumbiane, Marylin Castro Monsalvo, të cilat jetonin me të. Të dyja gratë janë vetëdorëzuar duke thirrur policinë në orët e paradites dhe, sipas burimeve hetimore, kanë pranuar autorësinë e vrasjes.

Sipas të dhënave të para, vrasja mund të ketë ndodhur disa ditë më parë, dhe trupi dyshohet se është prerë me sharrë në tre pjesë. Ende nuk dihet saktësisht në cilën dhomë ndodhi krimi, pasi në garazh, ku u gjet trupi, nuk ka shenja dhune.

Prokuroria e Udines ka nisur hetime të thelluara, ndërsa prokurorja Claudia Danelon ka bërë apel për qetësi dhe kujdes në nxjerrjen e konkluzioneve:

“Duhet analizuar çdo detaj dhe dëshmi për të kuptuar motivet e vërteta dhe përgjegjësinë individuale të secilës.”

Krimi dyshohet të ketë ndodhur pas një sherri të ashpër për arsye ende të paqarta, ndërsa rrethanat e sakta mbeten të paqarta dhe tronditëse për opinionin publik italian.