Më 26 korrik, në SHBA ka lindur Thaddeus Daniel Pierce, një foshnjë e veçantë që ka ardhur në jetë nga një embrion i ruajtur në ngrirje për më shumë se 30 vjet.

Embrioni i tij ishte krijuar në vitin 1994 gjatë një trajtimi IVF dhe ishte mbajtur në ruajtje nga nëna biologjike, Linda Archerd, deri sa vendosi ta “adoptojë” një çift tjetër përmes një agjencie të specializuar të quajtur Nightlight Christian Adoptions.

Thaddeus është biri biologjik i Lindës, por u mbart dhe u lind nga Lindsey Pierce në nëntor të vitit 2024, pas transferimit të embrionit në mitrën e saj. Ajo dhe bashkëshorti i saj, Tim Pierce, që jetojnë në Ohio, u përzgjodhën si prindër të përshtatshëm përmes kësaj agjencie fetare, pasi plotësonin kriteret që kishte vendosur Linda: një çift i martuar, i besimit të krishterë dhe kaukazian.

Historia ka ngjallur vëmendje të madhe për shkak të moshës së embrionit, i cili rezulton të jetë një nga më të vjetrit ndonjëherë që sjell në jetë një fëmijë të shëndetshëm. Ndërsa Thaddeus sapo ka lindur, motra e tij biologjike ka tashmë 30 vjeç dhe është nënë e një vajze 10-vjeçare.

Sipas Lindsey, “Ai është shumë i qetë. Jemi të mahnitur që e kemi këtë foshnjë të çmuar”. Edhe Linda, nëna biologjike e Thaddeus, ka thënë se menjëherë pas lindjes vuri re se fëmija i ngjante shumë vajzës së saj kur ishte foshnjë.

Doktori që mbikëqyri procesin, John Gordon, themelues i Rejoice Fertility Clinic, ka theksuar se dëshira për të reduktuar numrin e embrioneve të ngrira ishte një nga arsyet pse klinika u krijua. Sipas të dhënave, miliona embrione IVF ndodhen aktualisht të ruajtura në ngrirje në mbarë botën, shpesh të tepërta pas procedurave të fekondimit.

Lindja e Thaddeus ngre pyetje të reja mbi mundësitë e teknologjisë riprodhuese dhe vendimet etike për embrionet e ruajtura ndër vite.