Në një kohë kur Tirana është kthyer në një makth për të gjetur një vend parkimi, disa individë duket se e kanë gjetur “zgjidhjen” për veten e tyre dhe të gjithë fisin. Kështu ndodh edhe në rrugën “Lidhja e Prizrenit”, pranë Gardës, ku një qytetar ka zaptuar sheshpushimin e pallatit dhe hyrjen e rrugicës, duke u mohuar të gjithë të tjerëve të drejtën për të parkuar.

Sipas denoncuesit, ky banor mban prej të paktën 10 vitesh 3 automjete të prishura, të cilat nuk lëvizin dhe shërbejnë vetëm për të zënë vendet e parkimit. Por si të mos mjaftonte kjo, zotëria i ka mbushur nervat banorëve duke parkuar edhe një “C Class” fiks në hyrje të rrugicës, që askush tjetër të mos ketë mundësi të futet.

“Përshëndetje JOQ. Përveç 3 makinave që kanë 10 vite që nuk punojnë, ky zotëri lë dhe C Class-in në hyrje të rrugës që të mos parkojë askush tjetër. Rruga ‘Lidhja e Prizrenit’, te Garda Bllok. Ka zaptuar gjithë rrugicën ku mund të parkojnë të paktën 10 makina. Publikoje të lutem anonim. Ka makinë tjetër ky dhe çuni i vet dhe i ruajnë vendet për ato,” shkruan denoncuesi që kërkon të mbetet anonim.

Banorët kërkojnë ndërhyrjen e institucioneve për largimin e këtyre automjeteve të vjetra dhe zhbllokimin e hapësirave publike, që parkimi t’u rikthehet të gjithë komunitetit dhe mos të qëndrojë më “Trok e Xanun” në favor të një familje.