Një ngjarje tronditëse ka ndodhur në Karolinën e Jugut, SHBA, ku një djalë 12-vjeçar, i quajtur Jaysen Carr, ka humbur jetën tragjikisht pasi u infektua me amebën vdekjeprurëse Naegleria fowleri, e njohur ndryshe si “ameba që ha trurin”.

Jaysen ishte duke notuar në liqenin e njohur si Lake Murray gjatë fundjavës së 4 Korrikut, kur u ekspozua ndaj mikroorganizmit të rrezikshëm që jeton në ujëra të ëmbla dhe të ngrohta. Simptomat nisën me dhimbje koke dhe përzierje, por gjendja e tij u përkeqësua me shpejtësi dhe ai ndërroi jetë më 18 korrik.

Babai i tij, Clarence Carr, i tronditur thellë nga kjo humbje, ka kërkuar që të rritet ndërgjegjësimi për këtë infeksion vdekjeprurës:

“E humbëm djalin tonë vetëm sepse ai ishte fëmijë dhe notoi në një vend që mendonim se ishte i sigurt. Kjo nuk është e pranueshme. Jam i tmerruar se do t’i ndodhë dikujt tjetër,” u shpreh ai për Associated Press.

Përmes avokatit të familjes, është bërë me dije se shteti i Karolinës së Jugut, ashtu si shumë shtete të tjera në SHBA, nuk ka ligje që detyrojnë raportimin publik të infeksioneve apo vdekjeve nga kjo amebë.

Familja ka krijuar gjithashtu një faqe GoFundMe për të kërkuar ndihmë financiare nga komuniteti, ndërsa shprehet e vendosur të sensibilizojë publikun në mënyrë që kjo tragjedi të mos i ndodhë askujt tjetër.

Naegleria fowleri, e njohur si “ameba trungrënëse”, është një mikroorganizëm vdekjeprurës që gjendet në ujëra të ëmbla dhe të ngrohta, si liqene, lumenj apo pishina të keqklorinuara.

Infeksioni ndodh kur uji i ndotur hyn përmes hundës gjatë zhytjes ose notit, ameba shkon në tru dhe shkakton dëmtim fatal brenda pak ditësh.

Naegleria fowleri ka një shkallë vdekshmërie jashtëzakonisht të lartë, me mbi 97% të rasteve që përfundojnë në vdekje. Kjo për shkak të dëmit të madh që i shkakton trurit dhe vështirësisë për ta trajtuar në mënyrë efektive, ndaj ndërgjegjësimi dhe kujdesi janë jetikë gjatë verës në ujëra të embla.