Një zhytës profesionist ka ngritur alarmin për një specie të rrezikshme që, sipas tij, ka mbërritur kohët e fundit në ujërat shqiptare.
I ftuar në një intervistë për MCN, ai deklaroi se bëhet fjalë për një peshk me helm shumë të fortë, që po përhapet me shpejtësi në detet e botës dhe tashmë është parë edhe në brigjet tona.
“Ky peshk nuk është si të tjerët. Është shumë më helmues, dhe mund të gjendet si në thellësi, ashtu edhe pranë bregut”, tha ai, duke shtuar se një nga shokët e tij është pickuar nga ky peshk dhe ka përjetuar dhimbje të forta pas kontaktit.
Zhytësi tha se bëhet fjalë për peshkun “luan” — i njohur për pickimin helmues.
Ai u bëri thirrje pushuesve dhe notarëve të jenë të kujdesshëm, sidomos në zonat ku uji është më i cekët dhe me shkëmbinj, pasi kontakti me këtë peshk mund të shkaktojë dhimbje të mëdha dhe komplikacione shëndetësore.
Autoritetet ende nuk kanë konfirmuar zyrtarisht praninë e këtij peshku në Shqipëri.
