Një aksident i rëndë rrugor ka ndodhur pasditen e 2 gushtit, në zonën Pont-du-Château të Francës, ku një makinë ka dalë nga rruga dhe ka përfunduar në një fushë misri. Ngjarja, e raportuar nga mediat franceze, ka sjellë vdekjen e një të riu dhe ka lënë të plagosur rëndë dy persona të tjerë.

Sipas informacioneve zyrtare të publikuara nga mediat franceze, drejtuesi i mjetit është nxjerrë jashtë makinës dhe nuk ka mundur të mbijetojë, ndërsa dy pasagjerët e tjerë, të moshave 21 dhe 23 vjeç, janë transportuar në gjendje të rëndë drejt spitalit CHU të Clermont-Ferrand.

Një hetim ka nisur për të zbuluar rrethanat e plota të ngjarjes, ndërkohë që dyshohet se shkak mund të ketë qenë shpejtësia e lartë.

Ndërkohë, burime të pakonfirmuara për redaksinë e JOQ Albania bëjnë me dije se viktima mund të jetë një 22-vjeçar shqiptar me origjinë nga Shkodra, i quajtur Jusuf. Ende nuk ka një konfirmim zyrtar për identitetin e të ndjerit, ndaj ky informacion duhet marrë me rezervë.

Në pritje të një konfirmimi nga autoritetet lokale apo konsullata shqiptare në Francë, ne do të vijojmë të ndjekim nga afër zhvillimet për këtë ngjarje të rëndë.