Një festë në Los Angeles është kthyer në tragjedi pasi nga disa të shtëna me armë zjarri, humbën jetën dy persona dhe gjashtë të tjerë u plagosën. Departamenti i Policisë së Los Anxhelosit ka nisur hetimet mbi ngjarjen e rëndë dhe dyshohet se të shtënat kanë ardhur nga anëtarët e bandat kriminale.

Drejtuesja e Policisë së Los Anxhelosit, Leticia Ruiz, konfirmoi se oficerët që po patrullonin zonën vunë re një person të armatosur që vrapoi drejt vendit ku po festohej një ditëlindje dhe e mbyllën festën rreth orës 23:00. Në atë moment, një i dyshuar u arrestua për armëmbajtje. Më pas dy orë më vonë, u regjistruan disa të shtëna drejt turmës së njerëzve pas festës.

Një burrë, që besohet të jetë midis moshës 25 dhe 30 vjeç, u shpall i vdekur në vendngjarje, ndërsa një grua 52-vjeçare u dërgua në spital dhe atje ndërroi jetë. Dy të tjerë, një burrë 34-vjeçar dhe një burrë 37-vjeçar, u dërguan me urgjencë në një spital të zonës në gjendje kritike. Përveç kësaj, tre burra, të moshës 62, 28 dhe 26 vjeç, si dhe një grua 28-vjeçare, u dërguan në spital në gjendje të qëndrueshme.

Dëshmitarët thanë se të shtënat erdhën nga një sedan i kuq. Megjithatë, kjo nuk është konfirmuar nga autoritetet. Autori ose autorët e dyshuar janë ende të lirë. Të hënën në mëngjes, detektivët e vrasjeve të LAPD-së vazhduan të intervistonin dëshmitarët dhe të kontrollonin vendin e ngjarjes për prova.