Marko Ljubisa, i njohur ndryshe dhe me nofkën “Kan”, ka mbetur i plagosur pas një atentati me armë pranë pishinës së një hoteli në Przno, të Budvës.

Sulmi dyshohet se u krye nga një mysafir i hotelit, sipas raportimeve të gazetës Vijesti.

Mediat lokale e kanë konsideruar Ljubisën si lideri i një grupi kriminal në Budva, që punon ngushtë me klanin e Shkaljarit.

Kan është prej vitesh objektiv i sulmeve nga klani rival i Kavaçit, i cili ka tentuar disa herë ta eliminojë.

Ai u ka shpëtuar të paktën pesë atentateve, dy herë në Beograd dhe tre herë në Budva.

Një rast është ai i një sulmi të armatosur në gusht të vitit 2019 në Budvë, ku u plagosën dy shokët e tij, por ai mbeti i pa dëmtuar.

Përveç sulmeve në Mal të Zi, Kan është qëlluar edhe në Beograd, ku ka jetuar dhe udhëtuar shpesh ndërmjet Beogradit dhe Budvës. Sulmi i parë ndaj Kanit ndodhi në vitin 2009 në Beograd, kur ai u qëllua në parkingun e Arenës së Beogradit pas një ndeshjeje futbolli, ku ai u qëllua në qafë, dhe policia më pas arriti në përfundimin se bëhej fjalë për disa nga llogaritë e tij të pazgjidhura kriminale. Në vitin 2013, ai u plagos rëndë në Beograd, por arriti të mbijetojë.

Në janar të vitit 2021, policia malazeze arrestoi dy persona nga Beogradi, të cilët dyshohet se ishin vrasës me pagesë të dërguar për ta eliminuar Kanin. Gjatë arrestimit u gjetën armë dhe një fotografitë e Marko Ljubisës, si objektivi i atentatit.