Pas ndërhyrjes së policisë në orët e para të mëngjesit, e cila rrethoi ambientet ku operon media “News 24” dhe ndaloi hyrjen e gazetarëve, ka ardhur edhe reagimi zyrtar i Avokaturës së Shtetit.

Në deklaratën e saj, Avokatura sqaron se kontrata e qirasë me “Fokus Media News” ka përfunduar më 22 maj 2022, ndërsa Ministria e Financave dhe Ekonomisë i kishte kërkuar lirimin e ambienteve brenda datës 25 korrik 2025. Megjithatë, shoqëria nuk e ka dorëzuar pronën dhe ka kërkuar masa sigurie për të penguar ekzekutimin e këtij detyrimi.

Proceset gjyqësore, që kanë zgjatur mbi dy vite dhe kanë kaluar nëpër të gjitha shkallët, kulmuan më 14 korrik 2025 me vendimin e Gjykatës së Lartë, e cila konfirmoi detyrimin për lirimin e menjëhershëm të ambienteve. Gjykata theksoi se aktiviteti mediatik i shoqërisë mund të vazhdojë në hapësira të tjera, duke mos cenuar misionin e saj.

Sipas vendimit të Këshillit të Ministrave më 12 mars 2025, pronësia e kësaj pasurie iu kalua shoqërisë shtetërore “KAYO” sh.a., që do të përdorë ambientet për një projekt bashkëprodhimi të mjeteve motorike, me qëllim rivitalizimin e industrisë ushtarake dhe krijimin e vendeve të punës.

Avokatura e Shtetit nënvizon se do të ndjekë me vendosmëri çdo mjet ligjor për zbatimin e vendimeve dhe mbrojtjen e pasurive shtetërore, duke e konsideruar këtë detyrë të paanashkalueshme për qytetarët dhe për rendin kushtetues.

Ndërkohë, procedurat ligjore për marrjen në posedim të pronës janë në zhvillim e sipër.

Deklarata e plotë e Avokaturës së Shtetit:

Në përmbushje të misionit të saj kushtetues dhe ligjor për mbrojtjen e interesave të Republikës së Shqipërisë, Avokatura e Shtetit informon opinionin publik mbi ecurinë dhe përfundimin e proceseve gjyqësore të zhvilluara me Shoqërinë “Fokus Media News”, lidhur me ambientet në pronësi shtetërore pranë ish-“Uzinës së Pjesëve të Këmbimit të Automjeteve”, në zonën kadastrale nr. 8170, të mbajtura pa titull ligjor prej më shumë se tre vitesh, pas përfundimit të kontratës së qirasë.

Me përfundimin e kontratës më datë 22 maj 2022, Ministria e Financave dhe Ekonomisë i ka komunikuar zyrtarisht shoqërisë kërkesën për lirimin e ambienteve brenda datës 25 korrik 2022, në përputhje me afatet kontraktuale.

Pavarësisht këtij njoftimi, subjekti nuk ka kryer dorëzimin vullnetar të pronës, por ka vijuar ta mbajë atë në kundërshtim me ligjin, duke iniciuar procese gjyqësore dhe duke kërkuar masa të përkohshme sigurimi me qëllim pengimin e ekzekutimit të detyrimit.

Që prej vitit 2022, çështja është shqyrtuar në të gjitha shkallët e gjyqësorit Gjykata e Shkallës së Parë, Gjykata e Apelit dhe Gjykata e Lartë dhe ka përfshirë gjithashtu katër vendime mbi masa sigurimi.

Vendimi më i fundit, i datës 14 korrik 2025, i dhënë nga Gjykata e Apelit Administrativ me trup gjykues prej tre gjyqtarësh, ka konfirmuar detyrimin për lirimin e menjëhershëm të ambientit. Në këtë vendim, gjykata ka theksuar se veprimtaria mediatike e shoqërisë nuk cenohet, pasi bëhet fjalë vetëm për ambiente pune që mund të sigurohen në hapësira të tjera, në pronësi ose me qira.

Me Vendimin e Këshillit të Ministrave nr. 158, datë 12 mars 2025, kjo pronë i është kaluar shoqërisë shtetërore “KAYO” sh.a., me destinacion ekskluziv përdorimin sipas objektit të saj, në këtë rast për bashkëprodhimin e mjeteve motorike.

Ky projekt strategjik synon rivitalizimin e industrisë ushtarake vendase, krijimin e vendeve të punës në ambientet e zonës së Shkozës dhe garantimin e interesave të sigurisë kombëtare dhe ekonomike.

Në pritje të vendimit të sipërcituar të Gjykatës së Apelit Administrativ, entet shtetërore, përfshirë “KAYO” sh.a., nuk kanë ndërmarrë veprime ekzekutive.

Tashmë, me rrëzimin përfundimtar të pretendimeve të palës private, kane vijuar procedurat ligjore për marrjen në posedim faktik të pronës te cilat janë në zhvillim e siper, për ekzekutimin e detyrimit të përcaktuar ne vendimet gjyqesore dhe lirimin e ambienteve te mbajtura pas perfundimit te kontrates.