Viti shkollor 2025 e gjen sistemin arsimor shqiptar me më pak nxënës se kurrë më parë në dekadën e fundit. Vetëm 528.602 fëmijë dhe të rinj janë regjistruar në të gjitha nivelet e arsimit parauniversitar, një rënie prej 1.5% krahasuar me vitin e kaluar, kur numri arrinte në 536.780.

Arsimi 9-vjeçar ka pësuar goditjen më të rëndë: brenda një viti, bankat e tij kanë humbur rreth 7.400 nxënës, një tkurrje gati 3%, që sinjalizon një boshatisje të shpejtë të shkollave bazë. Edhe arsimi i mesëm, qoftë ai i përgjithshëm apo profesional, ka regjistruar rënie, duke treguar se fenomeni është i përhapur dhe jo i kufizuar vetëm në ciklin bazë.

Këto shifra nuk janë thjesht statistika, por pasqyra e një realiteti më të gjerë: rënia e lindjeve, emigracioni masiv i familjeve të reja dhe mungesa e politikave efektive për të ndaluar zbrazjen e vendit. Nëse ky trend vijon, brenda pak vitesh, shumë shkolla veçanërisht në zonat rurale rrezikojnë të mbyllen, duke ndryshuar hartën arsimore të vendit.

Nëse ky trend vazhdon, Shqipëria do të zgjohet në një të ardhme ku zhurma e këmbëve të fëmijëve nëpër korridore do të jetë vetëm kujtim. Bankat e sotme bosh janë paralajmërimi i heshtur se vendi po humbet jo vetëm numra në statistika, por vetë ritmin e jetës.

Një popull pa fëmijë përballet me një të ardhme pa shpresë.