Më 10 gusht 2020, u publikua një histori që, në një vend tjetër, mund të ishte trajtuar si thriller politik por në Shqipëri kaloi thjesht si një lajm ditor. Ish-ministri Damian Gjiknuri, pas emërimit në qeverinë Rama, njohu një përmirësim të ndjeshëm në jetën ekonomike të familjes.

Nga tenderi i Unazës së Madhe me kompani fantazmë, tek lejet për HEC-e në kanione e parqe natyrore, gjithçka rridhte qetë si një projekt i mirëmenduar për zhvillimin personal të ministrit. Sigurisht, edhe bashkëshortja e tij Rovena Gjiknuri nuk mbeti pas.

Pasi hoqi dorë nga paga modeste në një media kombëtare, ajo shpërtheu në botën e biznesit privat, duke deklaruar miliona lekë në vit si dizajnere dhe projektuese hapësirash publike një sektor që, rastësisht, binte nën varësinë e të shoqit.

Madje, familja nuk u mjaftua vetëm me sukses financiar përqafoi edhe një paqe shpirtërore të veçantë, përmes një sekti indian. Guru Vishwananda u bë figurë qendrore në shtëpinë e Gjiknurit, i pritur në Rinas me përulësi që do ta kishin zili edhe në lindjen e largët.

Thuhet se në vend të biznes-planit, zonja lexonte mantra në mëngjes, ndërsa Damianit i ndizej karta e bankës sa herë ndizte një qiri të shenjtë.Një histori suksesi dhe një guru që të fryn jo vetëm mendjen, por edhe llogarinë. Pesë vite më vonë, panorama është kjo, asnjë hetim, asnjë përgjegjësi, asnjë bezdi nga drejtësia.

Rasti mbetet simbol i pandëshkueshmërisë në Shqipëri, ku lidhjet mes politikës, pasurisë dhe strukturave të errëta vazhdojnë të lulëzojnë në dritën e diellit pa përgjegjësi dhe pa drejtësi.