Tashmë mbarë bota e di që turizmi është i shtrenjtë në Shqipëri. Çfarë reagimi ka Kryeministri Rama

Çmimet rekord këtë verë: Deri 900 euro nata në jug. Rama paralajmëron masa ndaj çmimeve të larta në turizëm: “Po i bëni gropën vetes”

NOA SPECIALE –

Këtë sezon turistik, Shqipëria është përballur me çmime rekord në bregdet. Në Vlorë, disa hotele kanë ofruar dhoma deri në 900 euro nata. Ky nivel çmimesh ka ushqyer debatin publik se turizmi në vend po bëhet gjithnjë e më i shtrenjtë.

Një kërkim i thjeshtë për një natë qëndrim në jug, duke marrë rastësore një ditë të javës së ardhshme, tregoi marrëzinë e paparë të çmimeve që po ndodh në jug.

Kërkimi vetëm për një natë, një dhomë për dy persona u përqendrua në rajonin e Vlorës ku përfshihen qyteti, zonat përreth e deri në Dhërmi e Palasë.

Në Radhimë një natë siç shihni pamjen shkon 942 dollarë amerikanë.

Kryeministri Edi Rama ka reaguar pas debatit publik mbi çmimet e larta të turizmit në vend, duke paralajmëruar se në shtator do të flasë “shumë hapur dhe shumë qartë” për këtë çështje.

Ai tha se një pjesë e industrisë turistike po vepron vetëm për fitime afatshkurtra, pa menduar strategjikisht për të ardhmen. “Por, kap ça të kapësh sot” – sipas tij – rrezikon të kthehet në humbje për vetë bizneset, pasi investimet aktuale mund të mos shlyhen kurrë dhe të mos mbeten të qëndrueshme për brezat e ardhshëm.

Rama u shpreh se çmimet e larta po përhapin shpejt perceptimin se “Shqipëria është shumë e shtrenjtë”, çka dëmton imazhin turistik të vendit.

Për plazhet, ai tha se këtë vit është bërë një hap përpara, por i pamjaftueshëm, dhe paralajmëroi “masa radikale” për sezonin e ardhshëm. Sipas tij, bashkitë do të marrin më shumë kompetenca, por edhe do t’i nënshtrohen një “shkundjeje” për të përmirësuar menaxhimin. /noa.al