Një grua është gjetur e lidhur me zinxhir në qafë dhe e mbajtur nën ujë me dy pesha betoni pranë një moli peshkimi në provincën “Phang Nga” të Tajlandës.

Trupi u pikas nga banorë të zonës teksa notonte pranë molit “Ban Tha Yai”, një vend i njohur për peshkim dhe afër destinacioneve turistike si Phuket dhe Ko Phi Phi.

Policia njoftoi se identiteti, kombësia dhe vendbanimi i viktimës mbeten ende të panjohura. Ajo dyshohet të ketë qenë e vdekur për rreth dy ditë para se të dilte në sipërfaqe.

Viktima mendohet se ishte veshur me pantallona të shkurtra gri dhe një bluzë kafe me jakë të rrumbullakët.

Zinxhiri dhe pesha prej betoni të lidhura në qafë dyshohet se janë përdorur për ta mbajtur trupin nën ujë dhe për ta fshehur, por pavarësisht kësaj, ai ka dalë në breg. Trupi është dërguar për autopsi për të përcaktuar shkakun e vdekjes dhe për të zbuluar nëse gruaja ishte gjallë në momentin që u hodh në ujë.

Pamjet e kamerave të sigurisë në mol dhe zonat përreth po kontrollohen për gjurmë, ndërsa autoritetet lokale janë udhëzuar të verifikojnë nëse ka persona të zhdukur që përputhen me përshkrimin e saj.

Policia ka kërkuar ndihmën e publikut për çdo informacion lidhur me aktivitet të dyshimtë pranë molit “Ban Tha Yai” ditët e fundit. Në një rast të ngjashëm disa muaj më parë në provincën Rayong, hetuesit gjetën trupin e një gruaje brenda një valixhjeje të mbyllur, gjithashtu të mbajtur nën ujë me pesha betoni, pranë një fushe golfi.