Në podcastin “Shëndeti në rend të parë”, e mbështetur nga United Hospital, kardiologu invaziv, Edis Demiri foli për faktorët kryesorë që ndikojnë në zhvillimin e sëmundjeve të zemrës.

Ai theksoi se ndër rreziqet kryesore për sëmundje të arterieve koronare është historia familjare.

“Nëse një person ka anëtarë të familjes së shkallës së parë – si nënë, baba, motra apo vëlla – të cilët kanë pësuar infarkt, kanë kryer ndërhyrje kardiake apo operacione bypass në moshë të re, atëherë edhe ai person ka rrezik të lartë për sëmundje të arterieve koronare”, tha ai.

Demiri vijoi duke theksuar se faktori i dytë është diabeti, që është pothuajse i barasvlershëm me historinë familjare për rrezikun ndaj sëmundjeve të zemrës.

Ai përmendi se diabeti duhet trajtuar dhe menaxhuar me kujdes, pasi kontribuon në dëmtimin e enëve të gjakut dhe rrit rrezikun për komplikacione kardiake.

Tutje ai radhiti në vend të tretë edhe disa disa faktorë të tjerë, të cilët janë rrezik për sëmundje të zemrës.

“Këtu përfshihen konsumimi i duhanit, hipertensioni (presioni i lartë i gjakut), yndyrat e larta në gjak dhe faktorë të tjerë të lidhur me stilin e jetesës. Të gjithë këta faktorë ndikojnë në shëndetin e zemrës dhe duhet të kontrollohen për të parandaluar zhvillimin e sëmundjeve kardiovaskulare”, u shpreh Demiri.

Kardiologu Demiri nënvizoi rëndësinë e ndërgjegjësimit për këta faktorë dhe nevojën për kontrolle të rregullta mjekësore, si dhe për një stil jetese të shëndetshëm për të ruajtur shëndetin e zemrës.

Për më shumë ndiqni podcastin e plotë “Shëndeti në rend të parë”. /Telegrafi/