Vrasja tragjike e 14-vjeçarit Erald Xhejo në fshatin Pirg të Maliqit ka shkaktuar tronditje të thellë në komunitetin lokal dhe më gjerë. Banorët e fshatit Zvirinë, prej nga vinte viktima, janë shprehur të shokuar nga ngjarja, duke kujtuar Eraldin si një djalë të sjellshëm, të edukuar dhe të dashur për të gjithë.

“Familjen e njoh, e rregullt, djalë i shkëlqyer. Kalonte në rrugë dhe të respektonte në një mënyrë të atillë. Se si ndodhi kjo të lë pa fjalë fare. Ka dy çuna familja.”, u shpreh një banor.

E tronditur nga ngjarja u shpreh një tjetër banore që tha se po shkon për ngushëllime te familja.

“Se dinim fare, sot më mori djali. Tani do të shkoj te familja, jemi miq. Na ka tronditur ngjarja.”, shtoi një grua.

Ishte djalë kapedan, shton një banor tjetër, duke shtuar se kishte moshën e nipit të tij.

“Ishte djalë kapedan. Çfarë të them më tepër. Jam shumë i tronditur, në moshën e nipit tim.”

Krimi ndodhi në ambientet e jashtme të një lokali në fshatin Pirg, pas një konflikti mes dy të miturve, të cilët sipas hetimeve paraprake, kishin një përplasje të mëhershme. Sipas ekspertizës mjeko-ligjore, Erald Xhejo humbi jetën si pasojë e një goditjeje të vetme me thikë në zemër, që rezultoi fatale brenda pak minutash.

Autori i dyshuar, po ashtu 14 vjeç, është arrestuar nga policia. Ndaj tij rëndojnë akuzat për vrasje me dashje dhe drejtim të mjetit në mënyrë të parregullt, pasi pas ngjarjes ai ka tentuar të largohet me automjet.

Policia ka arrestuar gjithashtu babain dhe xhaxhain e të miturit, si dhe një 34-vjeçar tjetër, ndërsa katër të mitur të tjerë që ishin të pranishëm në vendngjarje janë proceduar penalisht për moskallëzim krimi dhe pengim të hetimeve.

Ngjarja ka ngritur shqetësime të forta për përhapjen e dhunës mes të rinjve, si dhe për mungesën e ndërhyrjeve parandaluese në komunitet dhe shkolla. Hetimet vazhdojnë për zbardhjen e plotë të rrethanave dhe identifikimin e përgjegjësive të secilit të përfshirë.