Një ngjarje prekëse ka ndodhur në Argjentinë, ku një qen endacak arriti të shpëtonte jetën e një foshnjeje të braktisur në të ftohtin e dimrit.

Një grua, Alejandra Griffa, teksa kalonte pranë parkut afër shtëpisë së saj, dëgjoi zhurma të çuditshme. Kur iu afrua vendit, ajo pa një qen me këlyshë të sapolindur. Por ajo që i tërhoqi vërtet vëmendjen ishte një dorë e vogël foshnje pranë qenit. Alejandra, e tronditur, mori menjëherë në duar foshnjën, e cila dukej se ishte vetëm një muaji.

Hetimet zbuluan se nëna e 33-vjeçare e fëmijës e kishte lënë të braktisur, duke e lënë të përballej me vdekjen nga i ftohti. Pikërisht në këtë moment, qeni i quajtur Way, i njohur për besnikërinë ndaj Alejandrës, ndërhyri dhe i shpëtoi jetën foshnjës.

Sipas raporteve të policisë, qeni kishte marrë foshnjën dhe e kishte vendosur pranë këlyshëve të tij, rreth 50 metra larg nga vendi ku ishte lënë. Falë ngrohtësisë së trupit të qenit dhe këlyshëve, foshnja arriti të mbijetonte deri në mbërritjen e ndihmës.

Polici Daniel Salcedo deklaroi:

“Way e mbajti foshnjën sikur të ishte një këlysh i saj. Mjekët thanë se, po të mos ishte kujdesi i qenit, foshnja me shumë gjasë nuk do të kishte mbijetuar.”

Kjo ngjarje e jashtëzakonshme tregon edhe një herë se kafshët kanë instinkte prindërore dhe aftësi të jashtëzakonshme për të ndjerë gjendjen e të tjerëve. Ekspertët theksojnë se qentë jo vetëm që kanë instinkte amësie të forta, por gjithashtu arrijnë të kuptojnë emocionet njerëzore – trishtimin, gëzimin apo zemërimin – vetëm duke parë fytyrat tona.

Ndërkohë, policia ka identifikuar nënën e foshnjës, e cila sipas hetimeve vuante prej kohësh nga depresioni.

Ngjarja ka prekur thellë opinionin publik dhe qeni Way është shpallur “hero” nga banorët lokalë.