Pasditja e sotme solli dallgë të fuqishme në bregdetin shqiptar, duke vënë në rrezik jetën e shumë pushuesve.
Situata më e rënduar u regjistrua në Shëngjin dhe Velipojë, ku në kullat e vrojtimit u ngrit flamuri i kuq si paralajmërim i qartë që pushuesit të largoheshin menjëherë nga uji.
Në Velipojë, dy persona rrezikuan të mbyteshin pasi u tërhoqën nga dallgët, por fatmirësisht u shpëtuan nga pushues të tjerë që ndodheshin aty pranë.
Pamjet e fundit të mbërritura në redaksinë tonë tregojnë se dallgët sollën ujin e detit deri tek çadrat dhe madje edhe në hapësirat e parkimit të automjeteve.
“Situata në Velipojë në orën 18:00, uji ka arritur deri te parkimi i makinave,” shkruan një qytetar.
Një punonjës policie shihet i futur në ujë duke i kërkuar qytetarëve që të dalin në breg.
