Kryetarja e komanduar e Bashkisë së Tiranës, Anuela Ristani u bën thirrje qytetarëve që të tregojnë kujdes për shkak të motit të përkeqësuar që pritet në ditët në vijim.

Sipas buletinit të Shërbimit Meteorologjik Ushtarak, nga data 29 gusht deri më 2 shtator vendi do të përballet me situata të vështira atmosferike, me reshje shiu me intensitet të lartë.

“Të dashur qytetarë. Sipas Buletinit Meteorologjik të Shërbimit Meteorologjik Ushtarak, për periudhën 29 Gusht 2 Shtator priten situata të vështira atmosferike me reshje shiu me intensitet të lartë.

Ju këshillojmë të tregoni kujdes gjatë këtyre ditëve, të shmangni lëvizjet e panevojshme në zonat me rrezik përmbytjeje dhe të merrni masat e nevojshme për sigurinë tuaj dhe të familjeve tuaja”, ka thënë Anuela Ristani.

Ajo garantoi se Strukturat e Bashkisë dhe Emergjencat Civile janë në gatishmëri të shtuar për menaxhimin e situatës, ndërkohë që më poshtë vë në dispozicion dhe numrat e Emergjencës:

112 – Emergjencat Civile

127 – Urgjenca Mjekësore

128 – Policia

Edhe Policia Rrugore apelon për të gjithë drejtuesit e automjeteve dhe motomjeteve që të tregojnë kujdes në akset rrugore ku mund të ketë prezencë uji.

Gjithashtu, atyre u kërkohet të mos drejtojnë automjetet apo motomjetet me shpejtësi tej normave të lejuara; të mos drejtojnë mjetet nën efektin e alkoolit; të vendosin rripin e sigurimit dhe të mos kryejnë parakalime të gabuara apo sjellje agresive në rrugë.

Policia Rrugore është prezente në akset rrugore nacionale, urbane e rurale, duke përdorur mjetet inteligjente për matjen e shpejtësisë, dronët dhe alkooltestuesit. Në rast nevoje, telefononi në numrin pa pagesë 112 dhe shërbimet e Policisë do t’ju vijnë menjëherë në ndihmë.