Sistemi gjyqësor në Shqipëri u shtrua si çështje edhe në studion e Breaking në Top News. Moderatorja Fjori Dardha pyeti LIVE avokatin Ervin Kallanxha në lidhje me një deklaratë të bërë nga ky së fundmi se disa nga „gjykatësit kanë probleme të shëndetit mendor“.

„Për fat të keq po. Ka disa raste për të cilat bëhet fjalë. Po të kemi parasysh zv/kryetarin e Gjykatës së Tiranës bëri një deklaratë për cilësinë e magjistratëve, dhe ka një problem për magjistratët e rinj përsa i përket njohjes së ligjit penal dhe procedurial. Unë personalisht për shkak të njohjeve, na kanë rezultuar disa raste që kanë probleme. Problem do të thotë, komunikimi që ke me qytetarin. Komunikimi me të bërtitura i përket një personi me probleme. Po ashtu edhe tek perceptimi i faktit, të tjera janë faktet dhe ndryshe perceptohen. Ka pasur shumë raste që nga sjelljet dyshon të mendosh se kanë probleme mendore. Ka dhe raste konkrete. Dhe ne habitemi se si janë pjesë e Gjyqësorit. Kryetari i Gjykatës nuk mund t`i thotë të gjitha për shkak të etikës,” tha Kallanxha.

“Isha në gjykatë të Tiranës dhe vjen një gjyqtar që ishte në proces Vettingu, vazhdon e kryen funksionin që do të thotë se e ka kaluar Vettingun. Vjen me drejton gishtin aty ku unë isha ulur brenda kornizave të lejueshme, dhe më thotë: Kush je ti? I them që jam gazetare. Më thotë çohu dhe dil përjashta. Nuk e kuptova kurrë pse e bëri, por kuptova që vetëm një njeri me probleme mendore, e bën këtë,” shtoi gazetarja Aida Topalli.