Një procedurë e fundit tenderuese e OBP (Operatorit të Botoksit* të Përqendruar) drejtuar nga Arlinda Pogaj për riparimin dhe mirëmbajtjen e autoambulancave të Spitalit Rajonal “Shefqet Ndroqi” ka ngritur pikëpyetje serioze mbi transparencën dhe integritetin e procesit.

Dokumentet e siguruara tregojnë se, megjithëse disa kompani paraqitën oferta konkurruese, në fund është shpallur fituese “AEE Service” sh.p.k., kompania e biznesmenit Thoma Profka, me një ofertë fituese prej 300 Milionë lekësh.

Nga pesë operatorët ekonomikë pjesëmarrës, katër janë skualifikuar për arsye teknike, konkretisht për mungesë të ambientit të përshtatshëm për shërbime.

Më 12 qershor 2025, operatori pjesëmarrës Amarildo Panda ngriti ankesë për modifikimin e dokumenteve të tenderit, duke sugjeruar se kushtet ishin përshtatur për fituesin e paracaktuar. Më 8 gusht 2025, kompania e tij “Auto Manoku Servis” depozitoi një tjetër ankesë për skualifikimin, duke akuzuar Komisionin e Vlerësimit për vendimmarrje të padrejtë.

Pavarësisht ankesave, më 28 gusht 2025, “AEE Service” u shpall fituese.

Komisioni i Prokurimit Publik, me vendim të datës 29 gusht 2025, vendosi të mbyllë procedurat administrative dhe t’i hapë rrugë kontratës me kompaninë fituese.

Burime brenda sistemit të prokurimeve sugjerojnë se ky tender është shembull tipik i favorizimit të kompanisë së Thoma Profkes, një emër i përfolur shpesh në kontrata publike të lidhura me automjetet.

Në qendër të akuzave është drejtoresha e Operatorit të Blerjeve të Përqendruara, Arlinda Pogaj, e cila akuzohet se ka orientuar procesin në mënyrë që të eliminoheshin konkurrentët dhe të mbetej vetëm një fitues i preferuar.

Këto pikëpyetje e kthejnë tenderin e “Shefqet Ndroqit” në një rast tipik që kërkon hetime të thelluara nga SPAK dhe institucionet antikorrupsion.