Këto pamje shqetësuese vijnë nga qyteti i Durrësit, ku mbrëmjen e djeshme disa vajza janë konfliktuar fizikisht me njëra-tjetrën.

Ngjarja ka ndodhur në orët e mbrëmjes, në zonën e rrethrrotullimit te Pallati i Sportit. Në pamjet e siguruara nga JOQ Albania, vajzat kapen për flokësh dhe qëllojnë njëra-tjetrën.

Një burrë dhe një grua kanë tentuar që t’i ndajnë në momentin kur po ziheshin. Ata shihen teksa futen dhe tërheqin njërën nga adoleshentet, por tentativa e tyre ishte thuajse e kotë pasi sherri vazhdoi.

Sipas qytetares që ka raportuar ngjarjen, sherri ka ndodhur për motive dashurie, dhe e gjitha për shkak të një djali. Po sipas saj, vajzat nuk janë më shumë se 16-vjeçare.

Ky rast ngre edhe një herë tjetër alarmin për situatën dhe mjedisin ku po rritet rinia shqiptare në ditët e sotme. Fatkeqësisht sherre të tilla na është dashur të raportojmë shumë gjatë javëve të fundit, por këto lajme duhet të shërbejnë si një mesazh për prindërit, që të tregohen më të kujdesshëm me fëmijët e tyre, dhe të kalojnë kohë duke biseduar me ta për shqetësimet që kanë.

Denoncimi i qytetares:

Kur do marrin shembull këto se sa po vjen dhe po degjenerohen gjeneratat e sotme. Vajzat janë vetëm 16-vjeçe dhe janë zënë mbrëmë në darkë në Durrës te Pallati i Sportit te Rrethi. Me sa dëgjova nga të sharat, janë konfliktuar për një djalë. Një burrë dhe një grua u futën për t’i ndarë, ndërsa të tjerët vetëm qeshnin dhe i shikonin. Këtë pamje e kam bërë nga ballkoni i pallatit tim. Vajzat ishin 3 kundër 1.