Edhe pse ëndrra më e madhe e Kreshnik Tomanit, 35-vjeçarit që humbi jetën pas një aksidenti rrugor më 24 gusht, ishte që vajzat e tij të shkolloheshin dhe Nikita të bëhej këngëtare, kjo ditë e parë e shkollës nisi ndryshe — me heshtje, mall dhe mungesë.
Nikita dhe Fjonisa, dy vajzat e tij, sot u kthyen në shkollë pa babain e tyre, të cilin e kishin gjithmonë pranë në këto ditë të rëndësishme. Të kapura përdore nga nëna e tyre, Kristina, e cila mbante gjithashtu në krah foshnjën 9-muajshe, ato iu drejtuan shkollës së mesme artistike “Jakov Xoxa” në Fier, me hapat e rënduar nga dhimbja.
Një ditë e veçantë për shumë nxënës, por e mbështjellë me ngjyrë gri për familjen Tomani. Sytë e nënës përpiqeshin të fshihnin lotët, ndërsa zemra i dridhej për çdo hap që bënin vajzat pa praninë e babait të tyre të dashur, që u shua shumë shpejt dhe padrejtësisht.
Kreshniku, i njohur nga publiku si babai i Nikitës, kishte fituar zemrat e shqiptarëve përmes paraqitjeve të përbashkëta me të bijën në media, duke treguar se do të bënte gjithçka për të mbështetur ëndrrën e saj për t’u bërë këngëtare.
Rikthimi në shkollë në Fier, me më pak nxënës se vitin e kaluar
Sakaq, rreth 13 mijë nxënës janë kthyer në shkollë këtë shtator në të gjithë territorin e qarkut të Fierit, ndërsa rreth 900 fëmijë u ulën për herë të parë në bankat shkollore.
Statistikat megjithatë tregojnë një ulje të numrit të nxënësve në disa zona:
Në Patos, janë 110 nxënës më pak se një vit më parë Në Roskovec, 50 nxënës më pak Në Mallakastër, vetëm 64 fëmijë kanë nisur klasën e parë, nga 93 vitin e kaluar
Një tjetër lajm i rëndësishëm është edhe shndërrimi i shkollës 9-vjeçare “Jorgo Sopiku” në Luar në shkollë vartëse, për shkak të numrit të ulët të nxënësve.