Nëna e një nxënëseje të klasës së katërt në shkollën “Vasil Shanto” ka ndarë me redaksinë e JOQ Albania një mesazh plot mirënjohje dhe emocion për mësuesen e vajzës së saj, zonjën Eleni Kaci.

Çdo mëngjes, mësuesja Eleni i pret fëmijët me buzëqeshje dhe dashuri, duke i bërë të ndihen si në një familje të dytë. Për të, nxënësit nuk janë thjesht fëmijë që mësojnë shkronja e numra, por “Bletët e saj punëtore”, të cilave u kushton përkujdesje dhe zemër.

Në ditën e parë të shkollës, ajo kishte menduar një surprizë të vogël për t’i pritur, duke u thënë me përzemërsi: “Mirë se u rikthyet në shkollë, bletët e mia punëtore!”, një gjest i thjeshtë por i mbushur me dashuri, që preku jo vetëm fëmijët, por edhe prindërit e tyre.

Kjo nënë tregon se ndihet me fat që vajza e saj ka një mësuese të tillë, e cila jo vetëm mëson, por edhe frymëzon, jo vetëm udhëzon, por edhe përqafon shpirtin e fëmijëve me mirësinë e saj. Për këtë arsye, ajo ka dashur që falenderimi të mos mbetet vetëm brenda klasës, por të bëhet publik, si një shembull i bukur për të gjithë.

Në mesazhin për JOQ, nëna shkruan:

“Përshëndetje JOQ! Ndoshta nuk do përzgjidhet si sms,, por po e dërgoj për të treguar që ka akoma disa mësuese që tregojnë interes për fëmijët.😌Jam prind i një fëmije në kalsën e IV, Shkolla “Vasil Shanto”. Doja të falënderoja nga zemra mëseuese Eleni Kaci për çdo mësim dhe buzëqeshje që fal. Je shembull që çdo mësues duhet ta ketë. Nuk po zgjatem, por një dhuratë e vogël që tregon shumë për fëmijët dhe për prindërit e tyre u shpërnda në klasë ditën e parë të shkollës me një mesazh të ngrohtë.🌝 Faleminderit nëse e publikoni! 😊”