Nga Ilir Dako

Nuk ka më dyshime. Ajo që ndodhi në Tiranë, Antwerp dhe në brigjet e USS Mount Whitney nuk është një sekuencë e rastësishme. Është një skenë e ndërtuar me mjeshtëri, ku diplomacia amerikane ka zgjedhur të flasë jo me fjalë, por me simbole, anulime, ftesa të riprogramuara dhe heshtje të orkestruar. Në qendër të kësaj skene nuk është më Edi Rama si partner, por si figurë e zëvendësuar, e dyshuar dhe e izoluar. Vizita e anijes USS Mount Whitney ka treguar qartazi raportet e ngrira të kryeministrit shqiptar me administratën Trump. Aktiviteti i caktuar të shtunën e kaluar ku i ftuari i nderit ishte Presidenti Begaj u anulua për tu zhvilluar tre ditë më pas. Në anijen USS Mount Whitney amerikanët ftuan sërish Presidentin Begaj, duke rikonfirmuar dimrin e acartë të izolimit që do të ketë përpara Edi Rama në raport me patronazhistin tonë historik SHBA. Mesazhi ishte simetrik me rastin Meta në 2021, të cilin amerikanët nuk denjuan ta hypin në anijen amerikane, duke i treguar qartazi se me personazhe që dalin kundër linjës së SHBA nuk ka marrëdhënie. Fati i Ilir Metës në 2021 dihet.

Mesazhi i të martës është një nga goditjet më të rënda që mund të marrë një kryeministër në detyrë, kur rolin e tij në raportet me SHBA e merr Presidenti Begaj me mbështetjen e presidentit Trump pas letrës plot mesazhe drejtuar kreut të shtetit shqiptar. Dita e djeshme ishte një ditë e komprimuar me mesazhe amerikane për politikën shqiptare në përgjithësi dhe për Edi Ramën në veçanti. Shteti amerikan lëshoi në drejtim të Kryeministrit shqiptar tre mesazhe të qarta dhe të prera. Mesazhi i parë i lëshuar është luftë kundër trafikut të drogës dhe zero tolerancë për trafikantët dhe suportuesit e tyre. Në të njëjtën ditë dy persona lëvizin në skaje të ndryshme, përfaqësuesja amerikane në Shqipëri, e cila deklaroi qartazi luftën e pakompromis kundër trafikantëve dhe krimit të organizuar sipas Urdhrit Ekzekutiv 14157, që krijon mekanizëm të posaçëm për ta etiketuar kartelet si organizata kriminale. Ky urdhër është kërcënim i drejtpërdrejte për kryeministrin shqiptar, i cilin është i lidhur kokë e këmbë me shumë bande nëpërmjet financimeve me tenderë, leje ndërtimi dhe tituj strategjikë.

Personazhi i dytë që është vënë në lëvizje është Sekretarja e Sigurisë së shteteve të Bashkuara Kristi Noem, e cila zbarkoi në Antwerp më 10 shtator 2025, u interpretua nga analistët si një kthesë e rëndësishme në strategjinë transatlantike përballë krimit të organizuar dhe trafikut ndërkombëtar të drogës. Prej vitesh, raportet e Europol dhe të agjencive ligjzbatuese amerikane kanë evidentuar faktin se grupe kriminale shqiptare janë bërë pjesë e pandashme e trafikut të kokainës që hyn nëpërmjet Antëerp-it dhe Roterdamit. Në shumë raste, bandat shqiptare kanë arritur të sigurojnë pozita kyçe në logjistikën e shpërndarjes, duke marrë famën e “partnerëve të besuar” të karteleve latinoamerikanë.

Kjo është arsyeja pse vizita e Noem në Antwerp nuk shihet vetëm si një zhvillim belg, por si një mesazh i qartë për Ballkanin, ku Shqipëria mbetet një hallkë e rëndësishme e kësaj zinxhiri kriminal. Në gjithë aktivitetin e sotëm ka një linjë të fortë deklaratash dhe takimesh të figurave të rëndësishme amerikane në zbërthimin e linjave të drogës që kanë burim dhe Shqipërinë e drejtuar nga Edi Rama me banditët e tij. Ndërkohë që goditja e tretë për Edi Ramën dhe njëkohësisht për Sali Berishën është deklarata e rizgjedhjes së kreut të SPAK. E Ngarkuara me Punë e SHBA-së, Nancy VanHorn, e cila pasi vlerësoi rolin e rëndësishëm të Altin Dumanit në betejën kundër trafikut të drogës lajmëroi se kreu i SPAK e ka mbyllur misionin e tij dhe kërkoi që përzgjedhja e pasardhësit të tij të jetë transparente dhe e paanshme.

Nëpërmjet kësaj deklarate, e Ngarkuara me Punë e SHBA-së, Nancy VanHorn, bëri të qartë se nuk do i hyjnë rrugës së pazareve me kupolën Rama-Berisha, por do asistojnë për të gjetur një Duman, tjetër të cilin do e zgjedhin nën asistencën dhe syrin vëzhgues të strukturave amerikane që kanë nën patronazh drejtësinë shqiptare. Tre mesazhe në një ditë që paralajmërojnë fatin e keq politik të një njeriu që ka humbur mbështetjen në SHBA, e cila i dha tre mandate falë mbështetjes së Soros në kupolën Biden. Ftesa për Begajn ishte mesazh i qartë se SHBA nuk shohin më partneritet me Edi Ramën dhe qeverisjen e tij sorosiane, e cila është qeverisje e vënë një dispozicion të familjes Soros dhe jo në shërbim të kombit shqiptar. Pas shpalljes së luftës nga ana e Trump kundër bandës së psikopatëve të Soros, ku Edi Rama është një nga gjeneralët e kësaj bande, mesazhi me anijen ishte një goditje e fortë për kryeministrin dhe qeverisjen e tij.