Një mësues në një kolegj profesional në qytetin Essen të Gjermanisë është plagosur rëndë nga një nxënës 17-vjeçar me origjinë nga Kosova identifikuar si Erjon S.. Sulmi ndodhi të premten e kaluar dhe autoritetet gjermane po e trajtojnë ngjarjen si të mundshme me sfond fetar. Ministri i Brendshëm i landit North Rhine-Westphalia, Herbert Reul, deklaroi se nga analiza e pajisjeve të të dyshuarit janë zbuluar video që sugjerojnë motive islamiste, përfshirë deklarata se mësuesi kishte fyer Profetin dhe fjalët “Allahu Ekber”.

I dyshuari, i cili u plagos gjatë arrestimit dhe aktualisht ndodhet në spital nën mbikëqyrje, kishte qenë më parë nën vëzhgim për sjellje të rrezikshme, përfshirë kërcënime, armëmbajtje pa leje dhe dhunë fizike. Megjithëse në vitin 2023 ishte klasifikuar si person me rrezik të mundshëm, më vonë ai u hoq nga lista për shkak të mungesës së incidenteve të reja për disa muaj. Tani, pas sulmit ndaj mësuesit, autoritetet gjermane po rishqyrtojnë vendimet e mëparshme për të.

Ngjarja ka shkaktuar shqetësim në opinionin publik dhe mes politikanëve, me deputetë që paralajmërojnë për rrezikun në rritje të radikalizmit. Në të njëjtën ditë në Essen ndodhi edhe një tentativë tjetër vrasjeje, ku viktimë ishte një burrë i pastrehë dhe po hetohet nëse i njëjti person është i përfshirë. Prokuroria e Përgjithshme Federale po shqyrton marrjen në dorë të hetimit për ta trajtuar rastin si të mundshëm terrorizëm.