Në një emision televiziv, ish-prokurori Eugen Beçi komentoi atentatin e rëndë që ndodhi së fundmi në Shkodër, ku Ragip Gila vrau dy persona dhe plagosi dy të tjerë.

Beçi theksoi se ngjarja nuk mund të shihet si një akt individual, por si pjesë e një përplasjeje të mundshme mes grupeve kriminale apo fiseve. “Krimi i organizuar po ndërthuret me hakmarrjen”, tha ai, duke shtuar se në disa lagje të qytetit, policia nuk arrin të hyjë.

Sipas tij, në këto zona janë krijuar baza të krimit, dhe nevojitet ndërhyrje e gjerë e shtetit dhe strukturave sociale për të rikthyer kontrollin.

Ish-prokurori Eugen Beçi: Ngjarja ndodhi në Shkodër, ku krimi i organizuar po ndërthuret me hakmarrjen dhe po krijon situatë tepër të rënduar. Te ngjarja në Shkodër nuk ka një autor. Besoj se ka pasur bashkëpunëtorë për ta larguar nga vendngjarja, por edhe policia veproi me efikasitet. Është e pamundur që personi të ketë vepruar vetëm. Autori ka thënë që e ka personale dhe nuk besoj se deklarata është e vërtetë. Është autori i parë që arrestohet në flagrancë për krime të rënda. Nuk mund ta besosh vetëm fjalën e autorit, por duhet të hetosh dhe mund të dalë përfundimi se mund të kemi përplasje mes fiseve apo krimit të organizuar.

Në Shkodër, ka zona të caktuara ku policia ka qenë inaktive. Në këto zona mund të jenë krijuar baza kriminale. Policia e Shkodrës duhet të ushtrojë kontroll territori në çdo lagje të qytetit. Shteti duhet të ndërhyjë edhe me struktura të tjera, me punonjësit socialë, me punonjësit e edukimit në shkollë, që pjesa që ngujohet të integrohet në shoqëri e mos ngelet me të kaluarën.