Aktori i humorit, Gazmend Paja u paraqit sërish mëngjesin e sotëm në Prokurorinë e Posaçme kundër Korrupsionit dhe Krimit të Organizuar.

I njohur edhe si investitor strategjik për një tokë të përfituar në Dhërmi, aktori u paraqit pranë organit të akuzës ku dhe qëndroi për rreth një orë.

Pas daljes së tij nga SPAK, ai dha një prononcim të shkurtër për mediat ku dhe nuk “kurseu as batutat”.

“Jo ishim ulur me prokurorin për një kafe dhe gabimisht më mori telefonin tim e ja mora të tijin. Erdha ja solla të tijin dhe e mora timin”, tha Paja, shkurtimisht për mediat duke mos dhënë më tepër informacione.

Sakaq theksojmë se burime për mediat bënë me dije se aktori ka qenë i pranishëm në organin e akuzës edhe para dy ditësh.

Kujtojmë se Paja ka përfituar 133 mijë metra katrorë tokë për të ndërtuar “Dhërmi Restort” një kompleks luksoz që ka fokusin turizmin elitar. Në këtë hapësirë do ndërtohen vila dhe një hotel me 5 yje. Hoteli do të ndërtohet në një sipërfaqe prej 25 mijë metra katrorë.

Pjesa tjetër prej 108 mijë metrash do përdorët për të ndërtuar vilat të cilat do të shiten nga kompanitë dhe nuk sjellin asnjë zhvillim publik për turizmin.

Në dhjetor të vitit të kaluar vetë Paja ka folur për statusin si “investitor strategjik” që ka marrë nga shteti shqiptar për të ndërtuar resortin luksoz në zonën e Dhërmiut. I ftuar në podkastin “Garage Lock”, ai zbuloi se banorët e Dhërmiut iu “lutën” vetë që ai t’u merrte tokat për investim.

“Investitori strategjik ka të bëjë me një situatë që unë nuk i rashë në qafë shtetit si çdo qytetar i republikës. Mu dha mundësia që me disa banorë të Dhërmiut të gjeja disa toka, kërkova ndihmën e disa miqëve të mi privatë që t’i futeshim kësaj gjëje. Investitorin nuk e kam marrë unë por kompanitë që plotësonin kushtet që kishte vënë qeveria.

Jo më kot, në Tiranë sot paguan 8+1% taksën e shtetit çdo ndërtues për të klasifikuar se cili ndërtues është më i zoti. Pra nuk i kam bërë unë, por kam thënë kam një tokë, “do të vish ta marrësh?”, nëse ai merr 9 lekë, unë marr 1. Sepse nuk e kam mundësinë për të zhvilluar një ndërtim dhe as nuk e marr vesh. Thjesht u përpoqa nga dashamirësia e publikut në terren që më thanë ‘ty ta besojmë se je djalë i mirë, na gjej një ndërtues’. Kështu ka lindur historia!

Kur për këtë e ka të drejtën një qytetar i panjohur, pse mos ta kem unë? Kaq është kjo! Biles nga lajmet padrejtësisht jam penalizuar nga shteti, duke mu zvogëluar benefitet që pretendoja. E prapë them nuk më intereson. Letrat janë aty, të vijë kush të dojë dhe t’i kontrollojë dhe ta kuptojë se jam shumë i pastër në këtë aspekt”, tha ndër të tjera në fjalën e tij aktori.