Një apel i dhimbshëm vjen nga dy nëna të reja, të cilat po kalojnë ditët dhe netët mes lotësh në spital, duke parë fëmijët e tyre të vegjël të përballen me sfidën më të madhe: luftën për të jetuar.
Dua Amara, vajza e parë e familjes, sapo erdhi në jetë u përball me komplikacione të rënda shëndetësore. Që nga ai moment është e intubuar dhe frymon vetëm falë aparaturave. Nëna e saj nuk ka mundur ta mbajë asnjëherë në krahë, nuk e ka prekur dot, veçse e shikon dhe e puth përmes xhamit të inkubatorit.
Ndërkohë, Sidriti i vogël, vetëm 5 muajsh, po vuan nga një problem i rëndë në zemër. Ai ka lindur me aortën e bllokuar dhe rrezikon të ndalojë së jetuari nga momenti në moment. Shpresa e vetme është një ndërhyrje urgjente jashtë vendit.
Prindërit e dy fëmijëve i bëjnë thirrje të gjithë shqiptarëve, brenda dhe jashtë vendit, të kontribuojnë sipas mundësive, për t’u dhënë shansin e jetës atyre që nuk kanë faj dhe që nuk kanë parë ende asgjë nga kjo botë.
Fondacioni Firdeus ka marrë përsipër të dy rastet dhe ka hapur një GoFundMe, ku kushdo që dëshiron mund të kontribuojë për të shpëtuar jetën e këtyre dy engjëjve të vegjël.
