Rritja e pagave që qeveria e paraqet si sukses, në realitet “po hahet” nga çmimet e larta. Sipas të dhënave më të fundit të INSTAT, paga reale mesatare mujore bruto në tremujorin e dytë të vitit 2025 ishte vetëm 70,288 lekë, ose rreth 130 euro më pak se në vitin 2020.

Në letër, paga mesatare ka arritur 83,906 lekë, por kjo është thjesht një shifër nominale që nuk përkthehet në fuqi reale blerëse. Inflacioni, i nxitur kryesisht nga rritja e çmimeve të ushqimeve dhe qirave, ka zhvlerësuar ndjeshëm çdo rritje.

Krahasuar me vitin 2020, rritja e pagave duket mbi 50% në terma nominalë, por në realitet fuqia blerëse është rritur vetëm me rreth 27%. Me fjalë të tjera, një shqiptar sot shpenzon rreth 84 mijë lekë për të blerë të njëjtat mallra që pesë vite më parë i merrte me 70 mijë lekë.

Të dhënat historike tregojnë qartë se gjatë 2021 inflacioni ishte i ulët dhe rritja e pagave solli më shumë para në xhep. Por në 2022 çmimet shpërthyen dhe e neutralizuan çdo përfitim. Vetëm në 2023 pagat reale arritën të rimarrin disi terren, ndërsa në 2024 për herë të parë kaluan pragun e 70 mijë lekëve.

Megjithatë, raporti mes pagës nominale dhe asaj reale ka rënë ndjeshëm: në 2022 paga reale ishte sa 90% e nominales, ndërsa sot është vetëm 84%.

Ekspertët theksojnë se ky hendek i thelluar po e bën rrogën e shqiptarëve gjithnjë e më të pavlefshme në raport me jetesën reale. “Rritja e pagës në letër nuk ka vlerë, nëse inflacioni vazhdon të hajë fuqinë blerëse të qytetarëve”, paralajmërojnë ata.

Në përditshmëri, qytetarët ndihen më të varfër se kurrë, edhe pse në statistika shfaqen si më të paguar.