Një aksident tragjik ka ndodhur pasditen e djeshme në Artogne të Italisë, ku viktimë e një aksidenti ka mbetur një 16-vjeçar me origjinë shqiptare.

Manuel Leti ishte duke udhëtuar me motoçikletën e tij, kur u përplas me cepin e një automjeti tip “Audi” të drejtuar nga një 44-vjeçar. Pas përplasjes me automjetin, adoleshenti përfundoi i përplasur me një shtyllë ndriçimi, çka i shkaktoi plagë të rënda e fatale në gjoks dhe në bark.

Ngjarja ndodhi rreth orës 14:30. I pari që tentoi ta ndihmonte të riun ishte një shok që e ndiqte nga pas me motor, por asgjë nuk ishte e mundur. Sipas raportimit nga mediat italiane, pavarësisht mbërritjes së menjëhershme të ambulancave dhe helikopterit, përpjekjet për ta mbajtur në jetë ishin të kota.

Manueli ishte djali i dy prindërve shqiptarë, dhe la pas me vuajte nënën, babain, një motër më të madhe dhe një vëlla më të vogël, si dhe shumë shokë shkolle dhe miq të cilët kanë mbetur të trishtuar.

Ai ishte student i shkencave kompjuterike në Shkollën Zanardelli të Studimeve të Avancuara në Darfo, si dhe një entuziast i motorëve i rrethuar nga miq që e kujtojnë si një të ri plot energji.

Funerali i Manuelit do të mbahet të hënën, më 22 shtator, në Kishën e Familjes së Shenjtë në Pian Camuno.

Redaksia jonë i shpreh ngushëllime familjarëve dhe të afërmve.