Tang Renjian, ish-ministër i Bujqësisë dhe Çështjeve Rurale në Kinë, është dënuar me vdekje me kusht nga një gjykatë në provincën Jilin, nën akuzën për marrje ryshfeti. Lajmi u bë i ditur nga agjencia shtetërore e lajmeve Xinhua.

Sipas raportimeve, Tang ka marrë ryshfete që përfshinin para dhe pasuri të paluajtshme me vlerë mbi 268 milionë juanë (rreth 37.6 milionë dollarë). Këto përfitime i ka marrë gjatë periudhës 2007–2024, kur mbante poste të ndryshme në administratë.

Gjykata e qytetit Changchun vendosi të pezullojë ekzekutimin e dënimit për dy vjet, duke marrë në konsideratë rrëfimin e tij për veprimtarinë korruptive.

Tang u përjashtua nga Partia Komuniste në nëntor të vitit 2024, gjashtë muaj pas hapjes së hetimit nga komisioni antikorrupsion dhe shkarkimit nga posti i ministrit.

Çështja e tij vjen pas një serie hetimesh të ngjashme që përfshinë edhe ish-ministrin e Mbrojtjes, Li Shangfu, si dhe paraardhësin e tij, Wei Fenghe.

Tang Renjian ka mbajtur gjithashtu detyrën e guvernatorit të provincës perëndimore Gansu nga viti 2017 deri në vitin 2020, përpara se të emërohej ministër.

Në janar të këtij viti, presidenti kinez Xi Jinping theksoi se korrupsioni përbën kërcënimin më të madh për Partinë Komuniste dhe paralajmëroi se fenomeni vazhdon të thellohet.